jonarnar.com

Ég fékk að sofa út í gær og svo fórum við í afmæli til Lísbetar Aniku. Það er ótrúlega gaman að fylgjast með hvað vinkonur hans Sigurjóns, Lísbet og Dóróthea, stækka hratt. Sigurjón og Dóróthea eru bæði “ákveðin” og því er oft hasar hjá þeim. Við fórum síðan að skoða Dreng Ólafsson og enduðum daginn með því að hitta Söndru og Vilhelm heima hjá okkur.

Í morgun vöknuðum við feðgar og fórum út í Fjarðarbakarí eins og við gerum flesta helgarmorgna. Við komum svo við í Hellisgerði að skoða okkur um. Myndir hér:

Hellisgerði

Júní 2008

Sigurjón komst í nefkirtlatöku á mánudaginn. Við höfum verið lengi á leiðinni, en hann hefur verið hálfslappur síðustu vikur. Aðgerðin sjálf gekk vel, en hann vaknaði illa og var ekki ánægður til að byrja með. Nú er bara að vona að þetta komi honum í gang fyrir sumarið.

Við feðgar vorum heima í gær að jafna okkur, og komumst aðeins út með ömmu hans. Hún færði Sigurjóni buff í tilefni dagsins, sem hann var sáttur við að hafa á hausnum.

Róðrafélagið Árin bar ekki sigur úr býtum á Sjómannadaginn. Það má margt til nefna sem afsakanir fyrir því, en það breytir engu héðan af. Þó sveið það óneitanlega að vera næstum sökkt við marklínuna af skemmtiferðaskipinu Eldingu sem bakkaði á okkur. Og í þokkabót var búið að fjarlægja sviðið þegar við komum í mark, svo sigurvegararnir fengu enga athöfn. Sem skipti þó litlu máli, því það var búið að týna bikarinum, maðurinn með medalíurnar var að fá sér köku á Strandgötu og kynnirinn var farinn heim. Ætli þetta sé ekki ágætis vísbending um stöðu Sjómannadagsins.

En tónleikarnir á sunnudagskvöld voru stórgóðir. Sigurjón var sérstaklega hrifin af Megas, en steinsofnaði undir Sálinni í gargandi látum.

“Nýjar” myndir frá apríl og maí:

Myndasúpa

Sigurjón Hinrik hefur verið hálf slappur undanfarið, og það var loksins staðfest í gær að nefkirtlarnir væru að safna sýklum og koma í veg fyrir að sýklalyf kæmu honum í lag. Að vísu vorum við búin að benda þremur læknum á þetta í tæpar sex vikur. Það á að rífa úr honum settið í næsta mánuði og þá ætti að vera blóm í haga.

Róðrafélagið Árin fær að öllum líkindum góða samkeppni á sunnudaginn, þrjú lið skráð til leiks og hugsanlega tvö til viðbótar. Æfingar hafa gengið vonum framar, og takturinn betri en á þessum tíma í fyrra. Það verður ræs um þrjúleytið á sunnudag.

Ég er kominn með nýtt númer: 694-3590. Use it or lose it.

Á sunnudagskvöld var fyrsta æfing hjá Árinni. Einar, Einar Örn, Grímur, Baldur og ég rérum, en Örvar sá um stýrið. Í kvöld verður svo líklega fyrsta æfing með fullum bát. Við erum aðallega að einbeita okkur að taktinum, og auðvitað að fullkomna tæknina sem er hernaðarleyndarmál.

Ég skráði í dag Róðrafélagið Árina til leiks á sjómannadaginn 1. júní. Við eigum titil að verja sem þýðir auðvitað að við verðum að koma þríefldir til leiks.

Afhending 2007: Einar, Einar Örn, Benni, Arnar, Skúli, Jón, Hlynur og óþekktur.

Liðsskipan er að komast á hreint, en ég geri ráð fyrir litlum breytingum á liðinu og í mesta lagi einn til tveir sem detta út og inn. Framundan eru stífar æfingar, enda rétt tæp vika þar til við þurfum að taka aftur við bikarinum.

Sigurjón er hress þessa dagana, er farinn að skilja einfaldar leiðbeiningar þegar honum hentar og bablar út í eitt. Hann hefur verið á tónlistarnámskeiði síðustu vikur og haft gaman af.  Í síðustu viku komu upp tveir jaxlar og aðrir tveir við það að brjótast í gegnum holdið.

Það hefur ekki verið lognmolla í Lækjargötunni, þó stöðufréttir séu fáar á netinu. Eins og venjulega snýst allt um Sigurjón og af honum er þetta helst að frétta:

• Hann gengur og hleypur út um allt
• Hann er með óstöðvandi munnræpu og verður vonandi altalandi bráðlega
• Hann fékk fyrstu blóðnasirnar um daginn
• Hann braut aðeins upp úr framtönn við að skalla baðkersbrún
• Hann hitti Atla og Víking um daginn
• Hann fór að gefa öndunum, og sýndi þeim áhuga í fyrsta sinn
• Hann fór á náttúrufræðisafn Kópavogs, og var dolfallinn yfir fiskabúrinu
• Hann fékk fyrsta páskaeggið
• Hann vill bara mata sig sjálfur með gaffli
• Hann prófaði aftur róluna sem er á svölunum og hló allan tímann

Og til að sanna þetta allt eru myndir:

Myndir frá mars

Við feðgar erum búnir að vera í fæðingarorlofi undanfarið, sem hefur verið stórkostlegt.

Ég hef raunar nýtt tímann til að vinna á bókastaflanum á náttborðinu, sem hefur náð nýjum (og stórhættulegum) hæðum. Íslamistar og naívistar var svo niðurdrepandi að ég gafst upp í miðri bók. Heildarútgáfa Calvin & Hobbes kom mér aftur í gott skap. Ferðasögur Peters Freuchen frá Grænlandi upp úr þarsíðustu aldamótum eru frábær lesning. Fish, eftir Hugh Fernley-Whittingstall, er nærri jafn góð lesning og Meat. Hann getur skrifað um mat. Code Complete 2 fékk þriðju lesningu. Hells Angels eftir Hunter S. Thompson var sæmileg, en barn síns tíma.

Ég fór á svartfuglsveiðar með Einari og Agli, en við gripum í tómt. Hápunktur ferðarinnar var að sigla inn í Reykjavíkurhöfn, leggja við hliðina á varðskipinu Óðni og fá kaffi á Kaffivagninum. Hreindýrafeldurinn kom úr sútun, og var gullfallegur.

Og svo lærði ég að matreiða sushi, og djúpsteikja papadums.

Við feðgar fórum í tólf mánaða skoðun í hádeginu. Strákurinn var hress, 12 kíló og 82 cm. Gretti sig aðeins við að fá sprautu en tók gleði sína aftur upp við að púsla á biðstofunni. Hann heldur sig á vaxtarkúrfunni.

Febrúar 2008

Sigurjón uppgvötvar að þvottavélin er áhugaverð, Sigurjón borðar gúrku, Sigurjón í peysu frá Sigga og Sif. Fátt annað að gerast þessa daganna en Sigurjón-tengt.